វិបសាយល្អៗទាំង៥សម្រាប់អ្នកចង់រៀនកូដថ្មីថ្មោង

ក្នុងសម័យបច្ចេកវិទ្យារីកចំរើនឆាប់រហ័ស និងវិវត្តឥតឈប់ឈរ តម្រូវការ​អ្នក​ជំនាញ​ពត៌មាន​វិទ្យា​ផ្នែក សរសេរ​កម្មវិធី និង​​វិបសាយ​កាន់​​តែ​​កើន​​ឡើង​​ខ្ពស់។ ហើយ​វិស័យ​បច្ចេកវិទ្យា​ទាំង​នេះ​ក៏​បានជួយរួមចំណែកយ៉ាងច្រើន​ផងដែរ ដល់​វិស័យ​អប់រំ​ចាប់​ពី របៀប​នៃ​ការ​គ្រប់គ្រង ប្រព័ន្ធពត៌មាន​ទំនាក់ទំនង និងការចែកចាយ​ឯកសារ​អប់រំ​ទាំង​អស់​ត្រូវ​បាន​ធ្វើ​ឡើង​តាម​រយៈ​អ៊ីន​ធើ​ណេត​។ កត្តា​ទាំង​នេះ​ហើយ​បាន​ធ្វើ​ឲ្យ​ធន​ធាន​មនុស្ស​សម័យ​បច្ចុប្បន្ន​មានការប្រកួតប្រជែងខ្ពស់ និងឈានទៅមុខយ៉ាងឆាប់រហ័ស។ យុវជនសម័យ​នេះ​ត្រូវ​មានជំនាញ​រឹង​ផ្នែក​សរសេរ​កម្មវិធី និងអភិវឌ្ឍន៍វិបសាយ​នេះ​ដើម្បី​ងាយ​ស្រួល​ក្នុង​ការ​ចាប់​យក​ឱកាស​ការងារ​ល្អៗ​ និង​ទទួល​បាន​ប្រាក់​បៀវត្តន៍​ខ្ពស់។ ដូចនេះការរំពឹងតែ​លើការសិក្សាតាមកម្មវិធីអប់រំនៅតាមសាលា​តែមួយមុខ​ពិតជា​មិន​អាច​គ្រប់​គ្រាន់​ឡើយ។​ គឺ​យើង​ត្រូវ​ប្រឹង​ប្រែង​​រៀន​​ពី​ជំនាញ​រឹង​ទាំង​នេះ​បន្ថែមដោយខ្លួនឯង។

ខាង​ក្រោម​នេះ​ជាវិបសាយ​ដែល​យើងអាច​រៀន​យក​ជំ​នាញ​សរសេរ​កម្មវិធី​ និងអភិវឌ្ឍន៍​វិបសាយ​ដោយ​ឥត​គិត​ថ្លៃ​ ដែល​យើង​អាច​រៀន​បាន​ដោយ​ខ្លួន​ឯង​នៅ​ផ្ទះ​ឬនៅ​តាម​គ្រប់​ទី​កន្លែង​ដែលមាន​អ៉ីនធើណេត។ វិបសាយ​មួយ​ខាង​​ក្រោយគេ​ជា​វិបសាយ​ដែល​ ខ្ញុំ​ចូល​ចិត្ត​បំផុត​។

១. ​W3school

W3school ជាគេហទំព័រចាស់វស្សាមួយ ដែលអ្នកជំនាញពត៌មាន​វិទ្យា​ជា​ច្រើន​បានស្គាល់​វា​យ៉ាង​ច្បាស់​។ សម្រាប់អ្នកចាប់​ផ្លើម​រៀនថ្មី​ថ្មោង​គេប្រើ​ប្រាស់​គេហំទំព័រ​នេះដើម្បី​រៀន​ពីភាសារ​កូដ។ តែសម្រាប់អ្នកមាន​បទ​ពិសោធន៍ស្រាប់ៗវិញ​គេ​តែងប្រើ​វា​ទុក​មើល​​ពេល​​ភ្លេច​កូដ ឬស្វែងរកSyntaxថ្មី​តែប៉ុណ្ណោះ។

វាបាន​ត្រឹម​តែបង្ហោះ​មេរៀន​ និងដាក់​លំហាត់​អនុវត្តន៍​នៃមេរៀន វាប្រៀបដូចជាសៀវភៅវចនានុក្រម Syntax មួយក្បាល ឬ Wikipedia សម្រាប់អ្នកកូដឌឺអ៊ីចឹង។ ហេតុនេះហើយពេលដែលគេត្រូវបង្រៀនភាសារកូដដល់នរណាម្នាក់​គេ​ច្រើនយក វិបសាយ​នេះ​ឲ្យ​សិស្ស​មើល ហើយវាក៏ជាមូលហេតុដែលគេច្រើនយកវាមកមើលពេលភ្លេចដូចគ្នា​ ព្រោះវាស្រួល ចុច​មើល​វគ្គ​ណា​មុន​ក៏​បាន។

អ្នក​អាច​មើល​បាន​ថា​ភាសារ​កូដ​ណាខ្លះ​ដែល​ត្រូវ​រៀន​សម្រាប់​ជំនាញ​អ្វី​មួយ​ដូចមាន​បង្ហាញ​ក្នុងរូបខាងក្រោម។

២. Codecademy

គេហ​ទំព័រ​នេះ​ក៏​មិន​ខុស​អំពី គេហទំព៍រ​ខាងលើ​ដែរ គឺវា​មាន​វគ្គ​បណ្តុះបណ្តាល​ជំនាញ​ជា​ច្រើន​ដូច​ជា សរសេរកម្មវិធី​ អភិវឌ្ឍន៍​គេហ​ទំព័រ ឌីហ្សាញ គ្រប់គ្រងទិន្នន័យ តាមរយៈ​​ភាសារ​កូដ HTML & CSS SQL PHP Python Java C++។ វិបសាយ​នេះ​មិន​មែន​គ្រប់​ជំនាញ​​បណ្តុះ​​បណ្តាល​សុទ្ធតែ​ផ្តល់​ឲ្យ​ឥត​គិត​ថ្លៃ​នោះទេ។ តែអ្នក​នៅតែអាចរកជំនាញមួយចំនួន​ដែលគេ​ដាក់ឲ្យ​រៀន​ដោយ​ឥត​គិត​ថ្លៃ​​ដូចជា​ វគ្គដំបូងណែនាំអំពីJavascript នេះជាដើម ។

៣. FreeCodeCamp.com

នេះជា​គេហទំព័រ​ផ្តល់​មេរៀនអភិវឌ្ឍន៍​វិបសាយ និងកម្មវិធីលើប្រព័ន្ធអ៊ីនធើណេត​ដែល​ខ្ញុំ​ចូលចិត្ត​​ជាង​គេ និងអ្វីដែល​ពិ​សេស​គឺ​មិន​​គិត​​ថ្លៃទាំងស្រុងតែ​ម្តង។ អ្វី​ដែល​ខ្ញុំ​ចូល​ចិត្ត​ក្នុង​វិបសាយនេះ គឺគេ​រៀប​​ចំ​មេរៀន​​ចម្រុះ​ភាសារ​កូដ​ដែល​ត្រូវ​ការចាំ​បាច់​ក្នុង​​ជំនាញ​​អភិវឌ្ឍន៍​គេហទំព័រ​​ក្នុង​​វគ្គ​តែ​មួយ តាម​លំ​ដាប់​​តាំង​ពី​ដើម ដល់​ចប់​ដោយ​មិន​ចាំបា​ច់​ឲ្យ​យើង​ត្រូវ​ចុះ​ឈ្មោះ​រៀន​ច្រើន​វគ្គ​នោះ​ទេ។​ មេរៀនរៀបជាលំដាប់ពីកំរឹតមូលដ្ឋាន Web Designer ទៅដល់កំរឹតជំនាញ Fullstack Web Developer។ វិធីសាស្ត្របង្រៀនគឺផ្តោតលើការអនុវត្តន៍គម្រោង Project based ដែលងាយឲ្យអ្នករៀនឆាប់ចាប់បាន និងចងចាំ ពេលរៀនចប់យើងធ្វើបាន៥គម្រោងតែម្តង។ វាជា​វិបសាយ​​មិន​​សូវ​​មាន​​មុខ​​ងារ​​ច្រើន​រញ៉េរ​ញ៉ៃ​​ធ្វើ​ឲ្យ​ពិបាក​យល់​នោះ​ទេ គឺមុខងារតែមួយ​គត់គឺចែករំលែក​មេរៀន​ខាង​ផ្នែក​អភិវឌ្ឍន៍​គេហទំព័រ។ គ្រប់​មេរៀន​ពី​ចំនុច​ចាប់​ផ្តើម​​សម្រាប់​អ្នក​មិនទាន់​ចេះ​សោះ​ដល់​​អ្នក​មាន​បទ​ពិសោធន៍ក្នុង​ការ​ប្រើ​ប្រាស់​ភាសារកូដ​ ត្រូវ​បាន​​រៀប​ចំ​​យ៉ាង​យក​​ចិត្ត​​ទុក​​ដាក់​​ដើម្បី​​នឹង​​មាន​​ទំនាក់​​ទំនង​​តាម​​លំដាប់​​លំដោយ​ជាប់​​គ្ន​​ា​​ពី​​មេរៀន​​ពី​មួយ​​ទៅ​​មេរៀន​​មួយ​បន្ទាប់​ទៀត​។​ នៅ​ក្នុង​​វគ្គ​​បណ្តុះ​​បណ្តាល​​ជំនាញ​​​សរសេរ​​​គេហ​ទំព័រ​ គេ​​មាន​​បញ្ចូល​​​មេរៀន​​ភាសារ​កូដ​ដូចជា​ HTML CSS Javascript និង PHP  ដែល​ជា​ភាសារ​មិនអាចខ្វះ​បាន​​ក្នុង​ការ​បង្កើត​គេហទំព័រ។

លក្ខណៈវិសេសនៃវិបសាយ FreeCodeCamp គឺវាអនុញ្ញាតឲ្យយើងអនុវត្តបានភ្លាមៗនៅមេរៀន​ទាំងនោះ​ដូច​ដែល​រូបភាព​ខាងលើ​បាន​បង្ហាញ។ មិន​តែ​ប៉ុណ្ណោះគេហទំព័រនេះក៏បានប្រាប់យើងថាយើងបានឆ្លងកាត់ប៉ុន្មានជំហានហើយ និង​នៅ​ប៉ុន្មាន​ជំហាន​ទៀត​។ យើង​​នឹង​ត្រូវ​តម្រូវ​ឲ្យ​ធ្វើគ​ម្រោង​ផ្សេងៗ​តាម​ជំនាញ​និង​ជំហាន​ដែល​យើង​បាន​ឆ្លង​កាត់។ អ្នក​អាច​ចុច​លីង​តំណរ​នេះ​ដើម្បី​អាន​អត្តបទ​​ថ្មី​មួយ​ទៀតទាក់ទងនឹងវិធីចូល​ប្រើ​ប្រាស់​​គេហទំព័រ​មួយ​នេះ។ នៅពេលអ្នកបានបញ្ចប់វគ្គ និង​គម្រោង​ដែល​វិប​សាយ​នេះ​បាន​ដាក់់ឲ្យ អ្នក​អាច​ស្នើរ​សុំ​លិខិត​វិញ្ញា​បន​បត្រ​បញ្ជាក់​អំពី​ជំនាញ​របស់​អ្នក។ ខ្ញុំសូម​ធានា​ថា​ពេល​​ដែល​​អ្នក​​កាន់​​វិញ្ញា​បន​ប័ត្រ​នេះ នឹង​មិន​ខ្វះ​ការ​ងារ​ធ្វើ​ឡើយ។

៤. DataCamp

DataCamp ជាផ្លេតហ្វមរៀនអនឡាញ ដែលផ្តោតលើជំនាញ វិស្វករទិន្នន័យ Data Analyze និងអ្នកវិទ្យសាស្ត្រទិន្នន័យ Data Science ផ្តោតលើគ្រប់ភាសារសម្ខាន់សម្រាប់បម្រើការងារក្នុងវិស័យទិន្នន័យដូចជា R, Python, SQL, PowerBI, Tablue និង Excel ជាដើម។ DataCamp ផ្តល់នូវកម្មវិធីសិក្សាសម្បូបែប ទំនើប មានវិធីសាស្ត្របង្រៀនច្បាស់លាស់ គឺរៀន/បង្រៀន អនុវត្តន៍ និងតេស្ត៍ចំណេះដឹង។ គ្រប់វគ្គសិក្សាសុទ្ធតែមានគុណភាពមេរៀនខ្ពស់ មានលំហាត់អនុវត្ត ដែលឆ្លុះបញ្ចាំងទៅនឹងកិច្ចការងារក្នុងសង្គមផ្ទាល់ដែលអ្នករៀនអាចយកមេរៀននេះប្រើប្រាស់ក្នុងការងារបានតែម្តង។ ដែតាខេម គឹជាមជ្ឈមណ្ឌលរៀនកូដអនឡាញ ស្រដៀងនិង សហគមន៍ CampusKH ដែលបង្កើតដោយ Arvakas Techដូចគ្នាដែរ តែដែតាខេមផ្តោតតែលើវិទ្យាសាស្ត្រទិន្នន័យ បច្ចេកវិទ្យាបញ្ញាសិប្បនិមិត្ត AI។ តែចំនុចមួយដែលមិនសូវអំណោយផលដល់សិស្សានុសិស្សនោះគឺវគ្គសិក្សារបស់ DataCamp គិតថ្លៃសិក្សាប្រចាំខែ ដែលតម្រូវឲ្យអ្នកសិក្សាត្រូវរៀនឲ្យលឿនចប់មុនពេលសុពលភាពត្រូវបានបញ្ចប់។ តែកុំបារម្មណ៍អ្នកអាចស្នើរសុំគណនីសិស្សតាមរយះ គណនី Github ដើម្បីទទួលបាន កូប៉ុង សិក្សាឥតគិតថ្លៃឥតកំណត់រយៈពេល៣ខែ បើសិនអ្នកមានអ៊ីមែលបង្កើតឡើងដោយសាលារបស់អ្នក។​

៥. Udemy

Udemy ជាផ្លេតហ្វមផលិតមាតិការមេរៀនអនឡាញបង្រៀនជាវិដេអូរ។ Udemy មានទទួលអ្នកផលិតមាតិការមេរៀនពីជំវិញពិភពលោក ធ្វើឲ្យមេរៀននៅលើនេះសម្បូរបែប។ ប្រធានបទនៅលើ Udemy ដូចជាមិនមានការកំណត់ផ្តោតលើតែវិស័យបច្ចេកវិទ្យាអ្វីមួយឡើយ។ គុណភាពអប់រំគឺអាស្រ័យលើអ្នកបណ្តុះបណ្តាលនិមួយៗ និងវិធីសាស្ត្របង្រៀនក៏កំណត់ដោយអ្នករៀបចំមេរៀនផងដែរ។ អវកាសថេចសូមណែនាំគ្រូណែនាំផ្នែកអភិវឌ្ឍន៍កម្មវិធីលើអ៊ីនធើណេតដ៏ល្បីល្បាញមួយរូបគឺ អ្នកគ្រូបណ្ឌិត អេនជេឡា ដែលទទួលបានការពេញនិយមខ្លាំងមានអ្នកចុះឈ្មោះសិក្សាប្រមាណ ២.៦លានអ្នក លើវគ្គសិក្សាទាំង៧របស់គាត់។

សំគាល់៖ តំណលឺងទៅចុះឈ្មោះវិបសាយតាមរយះលីងខាងលើ គឺជាប្រភេទលីងអាហ្វីលីអេត (affiliate)។